Яшел Үзәндә вакансияләр ярминкәсенә 50дән артык кеше килде
25 март көнне Яшел Үзән шәһәренең халыкны эш белән тәэмин итү үзәгендә барлык теләүчеләр өчен вакантлы эш урыннары кече ярминкәсе узды.
Чарада «Казан дәүләт казна дары заводы» КФП һәм «Йомшак контейнерлар фабрикасы» ҖЧҖ катнашты. Эш бирүчеләр эш эзләүчеләргә 24 вакансия тәкъдим итте: аппаратчы, транспортчы, махсус эшләнмәләр җыючы, 1С программисты, смена мастеры, экструдер машинисты, тегүче һ. б.
Кадрлар хезмәте вәкилләре вакансияләр ярминкәсендә катнашучыларны предприятиеләр эшчәнлеге белән таныштырдылар, төрле мәгълүмати материаллар тәкъдим иттеләр. Яшел үзәнлеләр алга таба рәсми эшкә урнашу белән уку мөмкинлеге турында белделәр.
Кече вакансияләр ярминкәсенә 52 кеше килде. Алар барысы да эшкә урнашу мәсьәләләре буенча консультацияләр алдылар.
