Вакансияләр ярминкәсендә 13 буалы эшкә урнашу өчен юллама алды
10 март көнне Буа шәһәренең халыкны эш белән тәэмин итү үзәгендә вакантлы эш урыннары мини-ярминкәсе узды. Чараның максаты – гражданнарга туры килә торган эш эзләүдә ярдәм итү.
Вакансияләр ярминкәсендә Буа муниципаль районы предприятиеләренең кадрлар хезмәте вәкилләре катнашты: «Буа шикәре» ҖЧҖ, «Буа картлар һәм инвалидлар өчен интернат-йорты» дәүләт автоном социаль хезмәт күрсәтү учреждениесе, «Буа машина төзелеше заводы» ҖЧҖ, «Буа икмәк заводы» ҖЧҖ, «Русский Стандарт водка» ҖЧҖ филиалы «Буа спирт заводы».
Килүчеләргә түбәндәге вакансияләр тәкъдим ителде: транспортлаучы, буяучы, инженер, электр белән эретеп ябыштыручы, йөк төяүче, слесарь, тракторчы, машина йөртүче, слесарь-ремонтчы, кадрлар буенча инспектор, пешекче-кондитер, сатучы, няня, караучы (сиделка), токарь, кран машинисты, электр һәм газ белән эретеп ябыштыручы һ. б.
Чарада барлыгы 50 дән артык кеше катнашты. Әңгәмә нәтиҗәләре буенча эшкә урнашу өчен 13 юллама бирелде.