Түбән Камада яшәүче ишетү буенча инвалидлар компьтерда эшләргә өйрәнәләр

Түбән Камада ишетү мөмкинлекләре чикле булган 16 кеше компьтерда эшләү серләренә төшенә. Кичә  Excel программасында эшләргә өйрәнүгә багышланган чираттагы дәрес узды. "Веста" үзәге белгече Е.Латыпова инвалидларга мәглүматны сурдотәрҗемә ысулы - кул ишарәләре, ым белән җиткерергә тырышты. Дөрес, әлеге дәресләр барышында бераз кыенлыклар очрый, әмма тулаем алганда яңа белемнәр алу уңышлы гына бара. һәр укучы биредә вакытын бушка уздырмый - үзе өчен киләчәктә кирәк булачак белемнәр үзләштерә. Иң мөһиме - хәзер инвалидлар   өчен интернет аша аралаша алу, электрон дәүләт хезмәтләреннән иркен файдалану кебек мөмкинлекләр дә барлыкка киләчәк.