3 меңнән артык кеше хезмәт хакын вакытында ала алмый
Татарстанстат мәгълүматларына караганда, 1 нче декабрьгә республикада вакытында хезмәт хакларын ала алмаучы 3397 кеше исәпләнә. Акчаларын кайтармаган иң күп хезмәткәрләр авыл хуҗалыгы предприятеләрендә күзәтелә. Аларның саны 2 меңнән артык.
Башка тармакларда мондый эшчеләрнең саны сизелерлек ким. Эшкәртүче җитештерү предприятиеләрендә эш бирүчеләрнең 690 хезмәткәрләренә бурычы җыелган. Электроэнергия, газ һәм су җитештерү һәм тарату оешмалары – 203 хезмәткәргә акча түләргә тиеш, төзелештә – 166 кешегә хезмәт хакы түләнмәгән, калдык сулар җыю белән шөгыльләнүче оешмалар 152 хезмәткәргә бурычлы, мәдәният оешмалары – 55 кешегә хезмәт хакларын кайтарырга тиешләр.
1 кешегә булган хезмәт хакы буенча булган бурычның уртача күләме 18 меңнән бераз кимрәк сумманы тәшкил итә. Бер кешегә булган иң аз бурыч калдык сулар җыю белән шөгыльләнүче оешмаларда – 13616 сум. Иң күбе исә мәдәният оешмаларында - 1 кешегә 80 мең.