Социаль яклау һәм сәламәтлек саклау учреждениеләре белгечләре инвалид балалар һәм аларның ата-аналары белән эшләү аспектлары турында фикер алышачаклар

Семинарда социаль яклау һәм сәламәтлек саклау учреждениеләре хезмәткәрләре катнаша. Чара кысаларында өч көн дәвамында инвалид балалар һәм аларның ата-аналары белән эшләүнең төрле аспектлары каралачак. Тирәнрәк итеп әйткәндә, бу көнне тернәкләндерүнең яңа төрләрен куллану, терәк-хәрәкәт аппаратына зыян килгән балаларда вак моториканы камилләштерү, һөнәри юнәлеш эшен дәвам итү кебек сорауларга җавап эзләячәкләр.

Билгеләп үтик, бу - социаль яклау һәм сәламәтлек саклау учреждениеләре хезмәткәрләрен берләштергән тәүге чара. Ике төр хезмәтнең кысан эшчәнлеге тернәкләндерү процессын өзлексез итәргә ярдәм итәчәк. Уртак башкарылучы эш балаларның функциональ мөмкинлекләре дәрәҗәсен арттыру, балалар арасында гариплек очракларын киметү, сәламәтлекләренә зыян килгән балаларны җәмгыятькә кертеп җибәрүдә зур роль уйнаячак.

Семинар программасында бәхәс мәйданнары, мастер-класслар, күргәзмәләр дә эшләр дип көтелә.

Күргәзмәләрдә исә өй шартларында ярдәмгә килү хезмәте, иртә булышлык итү Кабинетлары да урын алачак. Алар республика җирлегендә эшләп карап, беренче яхшы нәтиҗәләр белән сөендерергә өлгергән иде инде. Шулай ук бу көнне Белешмә-уку кабинетлары, һәм тернәкләндерүнең    өр-яңа төре – ЛЕКОТЕКА һәм көндез калып тору  бүлеге дә тәкъдим ителәчәк.  

Иртәгә булачак пленар утырышны РТ Хезмәт, халыкны эш белән тәэмин итү һәм социаль яклау министры урынбасары Азат Хәбибулхак улы Габделәхәтов ачык дип белдерәчәк.

Семинарның төп максаты – төрле һөнәр, министрлык һәм тармаклар белгечләрен сыйдырган команда булдыру, шул команданың көче белән үсеше һәм сәламәтлегендә тайпылышлар булган балаларны тернәкләндерү буенча уртак нәтиҗәле эш оештырудан гыйбарәт.

Семинар Мәскәү шәһәренең авыр тормыш шартларында булган балаларны яклау Фонды теләктәшлеге белән әзерләнә.

Чара иртәгә «Шаляпин Палас Отель»дә сәгать 10.00 да башлана.