Тәтеш районында күп балалы гаиләләр йортларында АПС урнаштыру дәвам итә

2020 елның 31 гыйнвары, җомга

Балигъ булмаган балалар булган гаиләләрнең торак урыннарында янгын кисәтү максатыннан «Тәтеш балкышы» халыкка социаль хезмәт күрсәтү үзәгенең гаиләгә һәм балаларга социаль ярдәм күрсәтү бүлекчәсе белгечләре, янгын хезмәте хезмәткәрләре белән берлектә, автоматик янгын сигнализациясен урнаштыру буенча эш алып баралар. Аларны сатып алу өчен акча район бюджетыннан бүлеп бирелгән.

Элегрәк күп балалы гаиләләр, социаль куркыныч, авыр тормыш хәлендә булган гаиләләр яши торган 97 торак бина янгын хәбәрчеләре белән җиһазландырылган иде. Хәзерге вакытта Тәтеш районының 46 күп балалы гаилә торак йортларында АПС урнаштыру эшләре бара.

АПС урнаштыру барышында ата-аналар белән янгын куркынычсызлыгы таләпләрен үтәү буенча инструктажлар үткәрелә.