Татарстан Республикасы Хезмәт, халыкны эш белән тәэмин итү һәм социаль яклау министрлыгы

Башлангыч һәм урта һөнәри белем учреждениеләрендә белем алучы 700 дән артык укучы Көллиятчеләр Балында катнашачак

2012 елның 21 ноябре, чәршәмбе

22 ноябрьдә “Пирамида” күңел ачу үзәгендә Республикакүләм чара - Көллиятчеләр Балы узачак. Матур, тантаналы рәвештә бизәлгән залда җөмһүриятебезнең башлангыч һәм урта һөнәри белем учреждениеләрендә белем алучы иң оста, талантлы, өлгер укучылары очрашачак. Бу көнне Бал 700 дән артык кеше – үзенең уку йортында спортта да, укуда да иң алдынгылардан саналучы, төрле конкурс-бәйгеләрдә даими катнашып, призлы урыннар яулап килүче талантлы, иҗатка хирыс укучылар өчен махсус оештырыла. Бу танатаналы кичтә яшьләр гүзәл әдәп-әхлак, күтәренке рух кына түгел, уртак максат хакына, аңлы рәвештә эшче һөнәрләрне сайлау белән берләшүләрен дә күрсәтә алырга тиешләр.

Әлеге тантаналы чарага хөрмәтле кунак – ТР Премьер-министры Илдар Халиков та килер дип көтелә.

Бал кысаларында шулай ук ел саен ТР хезмәт, халыкны эш белән тәэмин итү һәм социаль яклау министрлыгы тарафыннан үткәрелүче “Киләчәккә билет” дип исемләнгән конкурска йомгак та ясалачак. Дүрт номинациядә җиңүчеләр һәм ике Гран-при иясе кыйммәтле бүләкләргә ия булачак.

Бал башлангач исә, матур күлмәкләр, фрак-костюмнар кигән егетләр-кызлар вальс ритмына әйләнеп, төрле биюләр башкарачаклар. Әлеге чара эшче һөнәрләрнең уңай образын булдыру, дәрәҗәләрен күтәрү, мәктәп укучыларын башлангыч һәм урта һөнәри белем учреждениеләренә җәлеп итүдә тагын бер мөһим адым булачак.

Бал ТР хезмәт, халыкны эш белән тәэмин итү һәм социаль яклау министрлыгы тарафыннан оештырыла.

Министрлыкның матбугат хезмәте үзәге

БАРЛЫК ЯҢАЛЫКЛАРНЫ УКУ