"Өмет чаткысы" тернәкләндерү үзәге "Гаҗәеп дөньяга тәрәзә" проектын тормышка ашыра
Быел Арча шәһәренең "Өмет чаткысы" мөмкинлекләре чикле балалар өчен тернәкләндерү үзәге Татарстан Республикасы Министрлар Кабинеты проектлар конкурсында грант отты. "Гаҗәеп дөньяга тәрәзә" проекты ярдәмендә интерактив өстәл сатып алу мөмкинлеге барлыкка килде.
Проектның җитәкчесе музыка белгече Галиева Ләйсән Илфат кызы. Тернәкләндерү процессында мәгълүмати технологияләрне дөрес кулану, балаларда кабул итү сәләтен үстерергә ярдәм итә, дәресләргә мотивацияне арттыра һәм танып-белү кызыксынуын стимуллаштыра. Үзәкнең белгечләре сүзе буенча, интерактив өстәлдән файдалану балаларга күп мәгълүмат алырга һәм мавыктыргыч шөгыльләр үткәрергә мөмкинлек бирә. Балаларга интерактив өстәл инструментлары белән эшләргә ошый, алар белән идарә итү өчен бармак белән орыну җитә.
Интерактив өстәлдә эшләү балаларда социаль күнекмәләрен үстерүгә ярдәм итә. Интерактив өстәл программасында каралган уеннардан тыш, педагоглар балаларны авторлык уеннарына өйрәтү мөмкинлегенә ия, Интернетны тоташтырырга һәм андагы уеннардан файдаланырга мөмкин. Интерактив өстәлне кулланып, белгечләр визуаль, ишетү яки кинестетик стильләрне куллана. Шуның аркасында, балалар зур төсле сурәтләр күрә, аларны мөстәкыйль рәвештә хәрәкәт иттерәләр. Бернинди башка җиһазлар да мондый мөмкинлекләр бирми.