«Минем булачак һөнәрем” дип исемләнгән республикакүләм конкурста катнашу өчен сорау язулары кабул ителә башлады

«Минем булачак һөнәрем” дип исемләнгән республикакүләм һөнәри осталык конкурсында катнашу өчен сорау язулары кабул итү дәвам итә. “Һөнәри юнәлешле” ярышта ТР Хезмәт, халыкны эш белән тәэмин итү һәм социаль яклау министрлыгы карамагында булган һөнәри белем алу йортлары укучылары катнаша ала. Сорау язулары агымдагы елның 12 нче ноябренә кадәр кабул ителәчәк.

Конкурста катнашу өчен нәрсәләр эшләргә соң? Иң беренче чиратта сорау язуы, компьютер презентациясе әзерләргә, шулай ук номинацияләрнең күңелгә хуш килгән темаларының берсе буенча  эссе язарга кирәк. Номинацияләрнең исемнәре исә болайрак яңгырый: “Минем һөнәр – һөнәри уңышымның башлангычы”, “Хезмәт базарында минем хезмәтем”.

Иншада теге яки бу һөнәрне ни өчен сайлаганны, һөнәри тәҗрибәң булса, аның гамәли якларын күрсәтергә кирәк. Ә презентациядә исә һөнәри осталык өлкәсендә ирешкән уңышларыңны ачып бирү, дәресләрдә һәм практикада булачак һөнәр буенча алган белемнәрне күрсәтү мөһим.

Конкурс ике этапта уза. Беренче, читтән торып уза торган турда, конкурс комиссиясе, катнашучылар тарафыннан тапшырылган хезмәтләрне бәяләп, иң көчле авторларны билгеләячәк. Алар исә үзләренең хезмәтләрен конкурсның икенче турында жюри каршында яклаячаклар.

Бәйгенең җиңүчеләрен диплом һәм кыйммәтле бүләкләр көтә.

Конкурсның учредителе -   ТР Хезмәт, халыкны эш белән тәэмин итү һәм социаль яклау министрлыгы.