Яр Чаллыда республиканың иң яхшы «Робинзоннарын» сайлаячаклар

2 көн эчендә командалар “Робинзон 2012” дип исемләнгән хәрби-патриотик уенда һәм “Җиңүгә таба юлда” хәрби-патриотик конкурсында катнашачаклар.

Слетны оештыручылар ирешергә теләгән максатлар: балигъ булмаганнарда Россиянең тарихи үткәненә, аның халкының мәдәниятенә карата әхлакый мөнәсәбәт формалаштыру, шулай ук илнең киләчәге өчен гражданлык җаваплылыгы тәрбияләү.

Бүгенге көнгә 20 команда слетта катнашырга  теләк белдергән. Алар – махсус учреждениеләрдә тәрбияләнүче социаль тернәкләндерүгә  мохтаҗ яшүсмерләр. Һәр җыелма команданың составында 10-17 яшьлек 5 әр бала.

“Робинзон” 3 этапта узачак: интеллектуаль тур, хәрби-патриотик полоса һәм “кыр кухнясы”. Төрле сынаулар барышында катнашучылар Россия тарихы елына багышланган викторина сорауларына җавап бирәчәкләр, пневматик коралдан атып караячаклар, төтен пәрдәсе аша үтеп, кыр шартларында ризык әзерләү серләренә төшенәчәкләр.

Слетның икенче көнендә ““Җиңүгә таба юлда” конкурсы кысаларында яшьләр Бөек Ватан сугышында катнашкан ватандашлары турында әзерләнгән слайдларны тәкъдим итерләр дип көтелә.

Барлык сынауларның нәтиҗәләре буенча җиңүчеләр билгеләнәчәк. Алар исә өйләренә “Слетның иң яхшы командасы”  исеме һәм кыйммәтле бүләкләр алып кайтачаклар.