"Шатлык" социаль приютында һөнәри юнәлеш бирүче чаралар узды
Питрәч районының "Шатлык" балалар һәм яшүсмерләр социаль приютында тәрбияче Р. Ахуджанова өлкән төркем балалары белән "Программист һөнәре" темасына ачык дәрес үткәрде.
Дәреснең максаты һәм бурычлары: тәрбияләнүчеләрнең программист һөнәре турында белемнәрен киңәйтү һәм тирәнәйтү; профессиянең үзенчәлекләре белән таныштыру; тәрбияләнүчеләргә һөнәри үзбилгеләнүдә ярдәм итү һәм программистлар әзерләүче Татарстан уку йортлары турында мәгълүмат бирү.
Дәрестә балалар заманча һөнәр – программист һөнәре барлыкка килү тарихы белән таныштылар. Тәрбияләнүчеләр яңа фактлар ачтылар: 1833 елда әле механик "аналитик" машинаның беренче моделе өчен берничә программа язган Ада Лавлейс беренче программист булган; 1941 елда немец инженеры Цузе беренче эшли торган компьютер, шулай ук аның өчен беренче программалар һәм беренче программалаштыру теле төзегән; бары тик XX гасыр уртасында гына программалаштыру һөнәргә әверелгән.
Балалар һөнәр турында видеороликлар карады, хезмәт базарында ихтыяҗ, хезмәт шартлары һәм программистларның вазыйфаи бурычлары белән таныштылар, Татарстанның уку йортлары турында мәгълүмат алдылар.
Дәрес нәтиҗәле узды, дәрес темасы тулысынча ачылды, дәрес алдыннан куелган максатларга һәм бурычларга ирешелде.
"Шатлык” приютында тәрбияче И.Ибрагимова җитәкчелегендә "Эшче һөнәрләргә дан" әңгәмә-уен үткәрелде. Уенда 12 өлкән мәктәп яшендәге балалар катнашты. Эшче һөнәрнең кирәклеген артыру максатында балалар арасында уен-әңгәмә булып узды. Тәрбияләнүчеләр хезмәт базарында ихтыяҗы булган һөнәрләр белән танышты. Әңгәмә барышында алар эшче һөнәрләрнең һәрдаим кирәк булачагын аңладылар.