Арча тернәкләндерү үзәгендә тәрбияләнүчеләргә янгын вакытында үз-үзеңне тоту кагыйдәләрен аңлаттылар
Арчаның "Өмет чаткысы" тернәкләндерү үзәге тәрбиячеләре ай саен “Янгын куркынычсызлыгы hәм янгын вакытында үз-үзеңне тоту кагыйдәләре” дигән профилактик дәресләр үткәрә.
4 нче июльдә тәрбияче Гүзәлия Вәлиева “Гадәттән тыш хәл hәм янгын нәрсә ул?” дигән профилактик чара уткәрде. Ул янгын сүндерү чаралары: янгын сүндерү краннары шулай ук сулыш органнарының шәхси саклану чаралары белән таныштырды.
Тернәкләндерү үзәге буенча экскурсия оештырылды, балалар янгын куркынычсызлыгы буенча стендларны, янгын краны hәм янгын сигнализациясен карадылар. Шулай ук балаларга өстәмә чыгу урыннарының кайда булуын hәм янгын килеп чыкканда нинди юнәлешләрдә хәрәкәт итәргә кирәклеген аңлатты.
Тәрбияче сүзләренә караганда, мондый дәресләр балаларда янгын куркынычсызлыгы кагыйдәләрен үтәүгә аңлы hәм җаваплы мөнәсәбәт формалаштыра hәм экстремаль хәлләрдән чыгу юлларын табырга ярдәм итә.