“Ышаныч” халыкка социаль хезмәт күрсәтү үзәгендә Пушкинга багышланган чара үтте
6 июнь көнне бөек рус шагыйре А.С. Пушкинга 220 ел тулу уңаеннан бөтен илдә төрле бәйрәм чаралары узачак. Шул уңайдан Яр Чаллы шәһәре “Ышаныч” халыкка социаль хезмәт күрсәтү үзәгенең балалар һәм гаиләгә социаль ярдәм күрсәтү бүлегендә дә актив әзерләнәләр.
Балигъ булмаган балаларны дөнья әдәбияты классигының иҗади мирасына җәлеп итү, рәсем сәнгате аша аның әсәрләренә сакчыл мөнәсәбәт тәрбияләү максатыннан яшь социаль хезмәт алучылар “Александр Сергеевич Пушкин геройлары дөньясында” дигән рәсем конкурсында катнашты.
16 катнашучы танылган әкиятләрне күзаллауларын чагылдырган 18 эшен тәкъдим итте. Әлеге эшләрдән бүлек белгечләре күргәзмә оештырды. 27 май көнне исә, шәһәрнең Үзәк балалар китапханәсендә иҗади бәйгедә катнашучыларны һәм җиңүчеләрне бүләкләү тантанасы узды.
Йомгаклау чарасында балалар һәм аларның әти-әниләре мавыктыргыч викторина сорауларына җавап бирде, китапханә хезмәткәрләре әзерләгән тематик презентация карады. Шулай ук А.С. Пушкинның әкиятләре буенча әдәби уенда актив катнашты: әкиятләрдән өзекләр искә төшерделәр, рәсемнәр буенча әкият таныдылар, әдәби геройларны билгеләделәр. Соңыннан әкиятләргә багышланган мультфильмнар тамаша кылдылар.
Узган чаралар балаларның рус әдәбиятының бөек язучысын белүләрен һәм аның әкиятләрен яратуларын күрсәтте. Бу шагыйрьнең үлемсез әсәрләре киләчәк буыннарны да сөендерәчәген дәлилли.