Татарстан Республикасы Хезмәт, халыкны эш белән тәэмин итү һәм социаль яклау министрлыгы

Җитештерүдә тагын 3 бәхетсезлек очрагы теркәлде

2012 елның 14 июне, пәнҗешәмбе

Татарстан Республикасы Хезмәт, халыкны эш белән тәэмин итү һәм социаль яклау министрлыгы җитештерүдәге бәхетсезлек очраклары нәтиҗәсендә зыян күргән хезмәткәрләр хакындагы мәгълүматларны публикацияләүне дәвам итә. ТР Дәүләт Хезмәт инспекциясе тарафыннан агымдагы елның 29 маеннан алып 9 июньгә кадәр булган вакыт аралыгында шундый өч очрак теркәлгән инде. Сәламәтлеккә зур зыян салган бәла-казалар «Агро фирма «Вамин Арча», «Техстрой» и «Парсек ЛТД» оешмаларында булган. Биредә авыл хуҗалыгы хезмәткәре һәм төзелеш өлкәсендә эшләүчеләр зыян күргәннәр.

Аяныч хәл «Агро фирма «Вамин Арча» ҖЧҖ тә (генераль директоры – Рәдиф Фәйзрахманов) 29 май көнне була. Кардадан сыерлар чыгарган вакытта 46 яшьлек М.Евменова сыерлар белән бәрелешә һәм янәшә яткан бүрәнәгә бәрелеп, башын бик каты җәрәхәтли. Теләчедә урнашкан «Техстрой» ҖЧҖ дә исә күңелсез хәл 2 июнь көнне теркәлә. А. Хуҗин җитәкчелегендәге төзелеш оешмасында Р.Мамлеев исемле балта остасы-бетончы зыян күрә. 41 яшьлек әлеге хезмәткәр таеп егыла һәм тез буынын җәрәхәтли. Дәүләт Хезмәт инспекциясе тарафыннан теркәлгән соңгы очрак исә 5 июнь көнне була. В.Мороз җитәкчелек иткән «Парсек ЛТД» ҖЧҖ дә 33 яшьлек мастер һәм балта остасы С.Акимов «КИП «Мастер» ААҖ территориясендәге җитештерү корпусында бетон плитәләрне демонтажлаганда абынып егыла һәм, нәтиҗәдә, сул аягын сындыра. Әлеге очраклар буенча тикшерү эшләре бара.

Исегезгә төшерәбез: Татарстан республикасы Хезмәт, халыкны эш белән тәэмин итү һәм социаль яклау министрлыгы сайтында “Монда кешеләр үлә һәм җәрәхәтләнә” дип исемләнгән баннер барлыкка килде. Биредә, хезмәтне саклау таләпләрен тупас рәвештә бозу аркасында хезмәткәрләре авыр җәрәхәтләнгән яки үлгән оешмалар исемлеге урын алып килә.

Хезмәт куркынычсызлыгы буенча гади генә кагыйдәләрне үтәгәндә бәхетсезлек очракларын киметергә мөмкин. Мультипликацион ролик рәвешендә тәкъдим ителгән “Җитештерүдә тормышны саклап калу кагыйдәләрен” әлеге сылтама аша карарга була: http://youtu.be/tT2f8EaPPOI.

БАРЛЫК ЯҢАЛЫКЛАРНЫ УКУ