Татарстан Республикасы Хезмәт, халыкны эш белән тәэмин итү һәм социаль яклау министрлыгы

2012 елның 17 мае, пәнҗешәмбе

Татарстан Республикасы Хезмәт, халыкны эш белән тәэмин итү һәм социаль яклау министрлыгы карамагында булган учреждениеләр арасында үткәрелүче спартакиаданың чираттагы зональ этабы Норлат районында узды. Биредә эш белән тәэмин итү үзәкләре, һөнәри белем һәм социаль тәэмин итү учреждениеләре хезмәткәрләре җиңел атлетика буенча эстафетада көч сынаштылар.

Бәйгедә Аксубай, Әлки, Алексеевск, Спасс, Чистай, Лаеш, Балык Бистәсе, Яңа Чишмә, Норлат районы командалары катнашты.

Киеренке ярышның нәтиҗәләре мондый: беренчелекне Норлат районы яулады. Икенче урында Алексеевск районы командасы. Ә беренче өчлекне тәмамлаучы җыелма команда Лаештан булды.Җиңүчеләр диплом, ә катнашучылар грамоталар белән бүләкләнде.

Шуңа охшаш спорт ярышы Баулы шәһәрендә дә үтте. Бәйгедә Сарман районы алдынгы позицияләрдә килә торды, һәм, нәтиҗәдә, беренчелекне дә ул яулады. Икенче мактаулы урын Баулы җыелма командасына бирелде. Өченче урын – Бөгелмә командасында.

Шуны билгеләү урынлы: спартакиада җәмгысе 10 спорт төре буенча уздырыла: өстәл теннисы, мини-футбол, стритбол, бильярд, чаңгыда чабу, волейбол, шахматлар, дартс, йөзү, җиңел атлетика эстафетасы. Спартакиада нәтиҗәләре агымдагы елның июнендә, Социаль хезмәткәр көненә багышланган бәйрәм кысаларында билгеле булачак. Әлеге спорт чарасының максаты: хезмәткәрләрнең физик яктан камилләшүенә уңай шартлар тудыру, министрлык карамагындагы учреждениеләрдә физик культура, спорт юнәлешен үстерү һәм саклау.

БАРЛЫК ЯҢАЛЫКЛАРНЫ УКУ