Социаль-тернәкләндерү бүлегендә көннәр күңелле үтә
Арча районының "Мәрхәмәтлек" үзәгенең социаль-тернәкләндерү бүлегендә өлкәннәрнең көннәре кызыклы һәм файдалы үтә.
Ял итүчеләрнең теләкләрен һәм мөмкинлекләрен исәпкә алып төзелгән программа өлкәннәргә файдалы һәм нәтиҗәле ял итү өчен бөтен мөмкинлекләрне дә тудыра.
Күптән түгел ял итүчеләр янына Ташкичү авылы мәдәният йорты хезмәткәрләре кунакка килде. Очрашуның төп максаты буыннар чылбырының өзелмичә саклануын тәэмин итеп, культура мирасын буыннан-буынга тапшыру торды.
Ял итүчеләр яшьләр белән кызыклы әңгәмә корды. Узләренең якларында гына үткәрелә торган бәйрәмнәр, йолалар турында сөйләде, борынгы җырларны башкардылар. Соңыннан Ташкичү мәдәният йорты хезмәткәрләре әзерләгән концерт карадылар.
Мондый очрашулар өлкәннәр һәм сәламәтлеге чикле кешеләр өчен бик мөһим. Чөнки нәкъ менә алар өлкәннәргә үзләренең кирәклекләрен тоярга, авыруларны җиңеп, киләчәккә өмет белән карарга ярдәм итә.