Зәйдә балалар бакчасында тәрбияләнүчеләр өчен һөнәри ориентлашу буенча квест узды
23 августта “Тылсымлы әкият” балалар бакчасы базасында “Йөз юл – берсе синеке” дип аталган һөнәри ориентлашу квесты узды. Әлеге чара Зәй мәшгульлек үзәге тарафыннан "PROFF-навигатор" һөнәри ориентлашу проекты уңаеннан оештырылды.
Квестта 41нче янгын сүндерү частенең янгыннарны кисәтү бүлеге башлыгы Владимир Дьячков, вакытлыча хәрби комиссар вазифаларын башкаручы Рәис Хәмзин, ЮХИДИ бүлегеннән полиция капитаны Рөстәм Биктаһиров, “Юл куркынычсызлыгы” учреждениесенең Зәй бүлеге башлыгы Вадим Иванов катнашты.
Балалар төрле һөнәрләрне чагылдырган җиде станцияне үтәргә тиеш булды. Һәр станциядә аларны үз эшенең остасы көтте: “ЮХИДИ инспекторы”, “Янгын сүндерүче”, “Хәрби”, “Табиб”, “Пешекче”, “Чәчтараш” һәм “Рәссам”. Алар балаларга үз һөнәрләре турында сөйләделәр, балалар ялыкмасын өчен һәр әңгәмә ахырында викторина-бәйгеләр оештырылды.
Чарада биш балалар бакчасының (“Тылсымлы әкият”, “Энҗе”, “Салават күпере”, “Шатлык”, “Урман әкияте”) мәктәпкә әзерлек төркемнәреннән 140 бала катнашты. Квест ахырында балаларга истәлеккә сувенерлар һәм яктылыкны кире кайтаручы элементлар тапшырылды.