Яр Чаллыда эшмәкәрлек эшчәнлеген башлаучылар өчен мастер-класслар уза
2018 елның 20 апрелендә Яр Чаллы шәһәре мәшгульлек үзәгендә эшмәкәрлеккә аяк басучылар өчен “Ничек максат куярга һәм аңа ирешергә” дигән мастер-класс үтте. Чараны эшмәкәр-тренер, коуч Наилә Калегина алып барды.
Семинар эшендә максатын дөрес куюны аеруча мөһим дип санаган, үз эшләрен оештырырга теләгән 20 кеше катнашты. Әлеге чара Кама арты эшлекле хатын-кызлар берләшмәсе, Сәүдә-сәнәгать палатасы белән берлектә үткәреләчәк мастер-классларның беренчесе иде.
“Кулланучылар турында мәгълүматны ничек җыярга” һәм “Акча җәлеп итү стратегиясе” дигән мастер-класслар 24 апрельдә 11.30 сәгатьтә һәм 13.00 сәгатьтә булачак. Алып баручылар – Е.В. Машкова, маркетинг тикшеренүләр үзәге директоры, коуч, социаль эшмәкәр Ю.В. Шадрова.
27 апрельдә 13.00 сәгатьтә “Социаль челтәрләрдә алга этәрү” дигән мастер-класс узачак. Аны эшмәкәрлекне яңа башлаучылар Ассоциациясе җитәкчесе Динара Захарова алып барачак.
Мәшгульлек үзәгенең актлар залында үтәчәк чарада катнашырга барлык теләүчеләр чакырыла. Керү ирекле.