Түбән Каманың “Веста” үзәге белгече яшүсмерләр төркеменә диагностика ясаган
Шушы көннәрдә Түбән Кама гаиләгә һәм балаларга социаль ярдәм үзәге психологы яшүсмерләргә “Нормадан читкә тайпылышлы тәртипкә хирыслыкны белүгә диагностика” уздырган. Чараның максаты девиант тотышның үзара бәйләнгән формалары: агрессия, үз-үзеңне җимерү, аддиктив һәм делинквент тотыш төрләрен тикшерүдән гыйбарәт булган. Тикшерүдә 12-15 яшьлек 54 яшүсмер катнашкан.
Психолог сүзләренә караганда, кайбер яшүсмерләрнең үз-үзен тотышында агрессив тенденцияләр чагыла, теге яки бу норма-кагыйдәләрне бозуга хирыслык сизелә. Әмма респондентларның берсендә дә үз тормышын аз кыйммәтле дип тану, чынбарлыктан качу кебек чалымнар күзәтелмәгән.
Тикшерү нәтиҗәсендә шундый йомгак ясалган: балалар белән шәхесара мөнәсәбәтләрне көйләү, социаль нормалар һәм таләпләрнең кыйммәтен аңлату буенча эш алып бару лазем.
Бу чара балигъ булмаганнар арасында көч куллану һәм мәрхәмәтсез караш күренешләрен кисәтү максатларыннан уздырылган.