«Шәфкать» үзәге карамагындагылар ашыгыч ярдәм эше турында белделәр
Түбән Кама районының «Шәфкать» халыкка социаль хезмәт күрсәтү комплекслы үзәгенең көндезге тору бүлекчәсе хезмәтләрен алучылар шушы көннәрдә ашыгыч медицина ярдәме станциясенә танып-белү экскурсиясенә киттеләр.
Станция мөдире Земфира Әхмәтшина һәм өлкән фельдшер Ринат Биктаһиров кунакларга станция эше турында җентекләп сөйләделәр, ашыгыч ярдәм бригадаларының ничек эшләвен һәм ни өчен аларның хезмәте җәмгыять өчен мөһим булуын аңлаттылар. Катнашучылар шулай ук ашыгыч ярдәм – пациентларны хастаханәгә тиз китерү генә түгел, ә ашыгыч медицина чараларының тулы бер комплексы икәнен белделәр.
Ашыгыч ярдәм машиналары җиһазлары белән танышу аеруча кызыксыну уятты. Һәр машина – теләсә нинди кичектергесез хәлләргә әзер мобиль кечкенә хастаханә кебек.
Экскурсия барышында социаль хезмәт алучылар күп сораулар бирделәр. Чара барлык катнашучыларда да якты тәэсирләр һәм онытылмаслык хис-кичерешләр калдырды.