«Кайгырту» приютында өлкәннәргә ярдәм акциясе уздырдылар

2025 елның 11 апреле, җомга

11 апрельдә Алексеевск районындагы балалар һәм яшүсмерләр өчен «Кайгырту» социаль приютында «Язгы игелек атнасы» акциясе үткәрелде. Аны Ватанны саклаучылар елына һәм Җиңүнең 80 еллыгына багышладылар.

«Сугыш хатын-кыз йөзле түгел...» программасы кысаларында приютта тәрбияләнүчеләр Бөек Ватан сугышы ветераны Мария Васильевна янына бардылар. Балалар аны игътибар белән чолгап алдылар, якынлашып килүче бәйрәм белән котладылар, хәлләреннән килгәнчә ярдәм күрсәттеләр – фатирны һәм йорт яны территориясен тәртипкә китерделәр.