Яр Чаллыда «Мөмкинлекләр фестивале» узды
Бүген Яр Чаллының 67 нче мәктәбе базасында инвалидлар һәм сәламәтлек мөмкинлекләре чикләнгән затлар арасында һөнәри осталык буенча «Абилимпикс» төбәк чемпионаты кысаларында II Республика «Мөмкинлекләр фестивале» узды.
Чарада 5 социаль хезмәт күрсәтү учреждениесеннән һәм мәгариф оешмаларыннан 40 кеше катнашты. Сәламләү сүзе белән катнашучылар алдында Татарстан Республикасы хезмәт, халыкны эш белән тәэмин итү һәм социаль яклау министры урынбасары Адель Мөбәрәкшин, «Һөнәри компетенцияләрне үстерү үзәге» АКБОның мәгариф өлкәсендә проектларны үстерү юнәлеше җитәкчесе Аделя Исхакова, идарә башлыгы урынбасары, Яр Чаллы шәһәре мәгариф идарәсенең гомуми белем бирү бүлеге башлыгы Лидия Золотарева чыгыш ясадылар.
Чара программасында 9 компетенция буенча биремнәр булды. Катнашучы һәркем һөнәри күнекмәләрен, осталыгын күрсәтте. Фестивальдә катнашучылар үзләренең осталыкларын күрсәтү өчен күп көч куйдылар.
Чара йомгаклары буенча катнашучыларга сертификатлар һәм истәлекле бүләкләр тапшырылды.
