«Хыял» социаль приютында «Геройлар гаиләсе» күргәзмәсе оештырылды

2025 елның 28 феврале, җомга

Ватанны саклаучылар елына багышланган чаралар кысаларында Аксубай районының «Хыял» балалар һәм яшүсмерләр социаль приютында «Геройлар гаиләсе» фотокүргәзмәсе оештырылды. Күргәзмәне ачуга махсус хәрби операциядә катнашучы һәм МХО катнашучыларының туганнары чакырылган иде.

Күргәзмәне «Ватанны саклаучылар» фондының социаль координаторы Татьяна Крайнова ачты. Ул 18 фотография тәкъдим итте. Экспозицияләр арасында элекке «Хыял» приютында тәрбияләнүчеләрнең – ике сугышчының портреты бар: Андрей Влодарчик хәрби биремне үтәгәндә батырларча һәлак булган, ә офицер Дмитрий Майков хатыны белән күргәзмә ачылышына килгән иде.

Балалар солдатларыбызның кораллануы, алгы сызыкта яшәүнең көнкүреш шартлары турында сораулар бирделәр.