«Юлдаш» интернат-йортында волонтерларны бүләкләделәр
Чистайның «Юлдаш» өлкәннәр һәм инвалидлар интернат-йортында берничә ел дәвамында интернат-йорт базасында эшчәнлек алып барган волонтерлык берләшмәләрен бүләкләү тантанасы булды.
Халыкара иреклеләр көнен бәйрәм итү уңаеннан «Юлдаш» интернат-йорты белгечләре кунаклар һәм чакырылган волонтерлар өчен концерт программасы оештырды. Чакырылган кунаклар Чистай медицина училищесының «Шәфкать» волонтерлар берләшмәсе вәкилләре һәм Ветераннар советының «көмеш» волонтерлары булды.
Бүләкләү тантанасын ачып, интернат-йорт директоры Дмитрий Басанов кунакларга күңел җылысы, ярдәмчеллеге, риясызлыклары өчен рәхмәт белдерде һәм лаеклы рәхмәт хатларын тапшырды. Шулай ук интернат-йортның эчке волонтерлары да истәлекле бүләкләр белән бүләкләнде – бу социаль хезмәт алучыларга кулларыннан килгәнчә ярдәм итүчеләр.
Учреждение волонтеры Анна Михеевага интернат-йорт карамагындагыларның тормыш сыйфатын үстерүгә юнәлдерелгән чараларны оештыруда һәм гамәлгә ашыруда даими ярдәм күрсәткәне өчен рәхмәт хаты тапшырылды.