«Астра» үзәге балалары тәм-томнар дөньясына чумды

2024 елның 10 декабре, сишәмбе

Шәфкатьлелек декадасы дәвам итә. Алабуга районындагы «Астра» мөмкинлекләре чикләнгән балалар һәм яшүсмерләр өчен тернәкләндерү үзәгендә тәрбияләнүчеләргә чираттагы сюрпризны «ЭССЕН Продакшн АГ» компаниясе бүләк итте. Хәйриячеләр «Безнең тирәдә һөнәрләр» программасын тормышка ашыруга кушылдылар һәм балалар өчен кондитер фабрикасына мавыктыргыч экскурсия оештырдылар.

Сәфәр бәләкәй татлы сөючеләрдә озакка истә калыр. Алар конфет, вафли һәм печенье җитештерү процессын кызыксынып күзәттеләр, продукциянең төргәкләнүен күрделәр, кызыксындырган сорауларын бирә алдылар.

Татлы ризыкларны әзерләүнең төрле этапларында татып карау күңелле сюрприз булды.

Балалар якты тәэсирләр, тәмле бүләкләр һәм «татлы» һөнәр үзләштерү хыялы алдылар.