Социаль контракт төзүнең яңа кагыйдәләре турында
2024 елның 1 гыйнварыннан социаль контракт нигезендә дәүләт социаль ярдәмен күрсәтүнең яңа кагыйдәләре үз көченә керде.
Төп үзгәрешләр:
1. Гражданнарның милек белән тәэмин ителеш дәрәҗәсе исәпкә алынмый;
2. Керемнәрне исәпкә алу чоры үзгәрде:
гаиләнең (ялгыз яшәүче гражданның) җан башына уртача керемен исәпләү гаилә әгъзаларының (ялгыз яшәүче гражданның) дәүләт социаль ярдәме күрсәтү турында гариза бирү ае алдыннан бер календарь айга кадәрге соңгы өч календарь айдагы керем суммасыннан чыгып башкарыла (элек – гариза бирү аена кадәр өч ай);
3. Социаль контракт нигезендә дәүләт социаль ярдәм күрсәтү хокукын билгеләгәндә гаиләнең җан башына уртача керем күләме Татарстан Республикасында билгеләнгән җан башына яшәү минимумы күләме белән чагыштырыла (элек – аз керемле гаиләнең яшәү минимумы зурлыгы белән, ул гаилә әгъзаларының социаль-демографик төркеменә (эшкә яраклы, бала, пенсионер) бәйле рәвештә яшәү минимумнары суммасы буларак билгеләнгән);
4. Гаиләнең уртача җан башына керемне исәпләгәндә гаилә составы үзгәрде.
Гаилә составына гариза бирүче, аның ире (хатыны), аның балигъ булмаган балалары, аның опекасы (попечительлеге) астында булган балалар һәм аның көндезге уку формасы буенча укый торган 23 яшькә кадәрге балалары керә (элек җан башына уртача керемне исәпләгәндә аз керемле гаилә составына туганлык һәм (яки) үзлек белән бәйле кешеләр кергән. Аларга бергә яшәүче һәм уртак хуҗалык алып баручы ир белән хатын, аларның балалары һәм ата-аналары, уллыкка алучылар һәм уллыкка алынганнар, абыйлар һәм апалар, үги уллар һәм үги кызлар кергән);
5. Шәхси эшмәкәрлекне оештыру һәм шәхси ярдәмче хуҗалык алып бару чаралары буенча социаль контрактлар төзегәндә гариза бирүчеләр үзләренең эшмәкәрлек компетенцияләре дәрәҗәсен билгеләү максатыннан мәҗбүри рәвештә тест узарга тиеш.
Канәгатьләнерлек булмаган нәтиҗә белән тест үткән гариза бирүчеләр социаль контракт төзелгәнче эшкуарлык компетенцияләрен үстерү өчен уку узалар, аның нәтиҗәләре буенча сертификат яки мондый укуның уңышлы үтүен раслаучы башка документ бирелә. Эшмәкәрлек компетенцияләрен үстерү өчен укыту граждан өчен түләүсез, кече һәм урта эшмәкәрлек субъектларына ярдәм инфраструктурасын тәшкил итүче оешмаларда, шул исәптән «Минем бизнес» үзәкләрендә башкарыла.
Эшмәкәрлек компетенцияләрен үстерү өчен укуны уңышлы узуын раслаучы сертификат яки башка документ алмаган очракта, дәүләт социаль ярдәмен билгеләүдән баш тарту турында карар кабул ителә.