Татарстанда кадрларга ихтыяҗның 76 % квалификацияле белгечләр тәшкил итә
Республиканың хезмәт базарындагы хәл хезмәткәрләргә ихтыяҗның артуы һәм мәшгульлекнең югары дәрәҗәсе белән характерлана – 62,1 %.
2023 елда мәшгульлек хезмәте органнарына эш эзләү максатыннан 31 мең кеше мөрәҗәгать иткән, шуларның 72 % эшкә урнаштырылган.
«Бүген без хезмәт базары – дәгъвачы базары дип әйтәбез», – дип билгеләп үтте бүген журналистлар белән әңгәмәдә министр Эльмира Зарипова.
Дәгъвачыларга 49 меңнән артык вакансия тәкъдим ителә. 1 эшсезгә 12 вакансия туры килә.
Кадрларга иң зур ихтыяҗ сәнәгатьтә (12 мең вакансия), төзелештә һәм торак-коммуналь хуҗалыкта (5,1 мең вакансия), транспорт өлкәсендә (3,5 мең вакансия), сәламәтлек саклауда (2,4 мең вакансия), мәгариф өлкәсендә (1,6 мең вакансия) барлыкка килде.
Икътисадның реаль секторында кадрларга ихтыяҗның 76 % квалификацияле белгечләр тәшкил итә, алар арасында алдынгы позицияләрне төзелеш белгечлекләре, машиналар һәм җиһазлар җитештерү буенча белгечләр биләп тора. Квалификациясез хезмәт һөнәрләре арасында йөк ташучылар, биналарны җыештыручылар һәм җыештыручылар кирәк.