«Астра» үзәгендә «Абилимпикс» чемпионаты җиңүчесе концерты узды
11 гыйнварда Алабуганың «Астра» мөмкинлекләре чикле балалар һәм яшүсмерләр өчен тернәкләндерү үзәген тәмамлаучы, «Абилимпикс» профессиональ осталык милли чемпионаты җиңүчесе Азалия Яфясованың концерты булды. Яшь башкаручы үз чыгышы белән үзәк хезмәткәрләрен, тәрбияләнүчеләрне һәм аларның әти-әниләрен сөендерде.
Башкарма комитет җитәкчесенең социаль үсеш буенча урынбасары Надир Курамшин Азалияне зур иҗади уңышлары белән котларга килде. Алабуга муниципаль районы башлыгы Рөстәм Нуриев исеменнән ул кызга чәчәкләр һәм концерт костюмы сатып алуга сертификат, ә тернәкләндерү үзәгенә типография хезмәтләренә сертификат тапшырды.
Үзәк директоры Галина Калашникова шәһәр җитәкчелегенә балаларга игътибар һәм учреждениегә ярдәм иткәне өчен рәхмәт белдерде.