Минзәләдә социаль хезмәт алучыларга бүләкләр тапшырылды
28 декабрьдә Минзәлә районы халыкка социаль хезмәт күрсәтү комплекслы үзәге белгечләре инвалид һәм социаль хезмәт алучы балаларга «Бәйрәм һәркемгә могҗиза бүләк итсен» дигән күңелле Яңа ел тамашасы бүләк иттеләр. Барлык балалар да Яңа ел бүләкләре алдылар. «Внешнеторговая компания «КАМАЗ» АҖ коллективы «Теләкләр чыршысы» акциясе кысаларында Кыш Бабайга хат язган 30 баланың хыялларын тормышка ашырды.
30 декабрьдә Минзәлә муниципаль районы хәйриячеләре социаль хезмәт алучылар арасыннан 11 ялгыз, аз хәрәкәтләнүче өлкән яшьтәге кешегә һәм мобилизацияләнгән гражданнарның гаилә әгъзалары өчен Яңа ел бүләкләре әзерләгәннәр иде. Кыш бабай киемендә халыкка социаль хезмәт күрсәтү комплекслы үзәге белгечләре өлкән яшьтәге кешеләргә бүләкләрне тапшырдылар.