«Балкыш» приютында тәрбияләнүчеләр фотография буенча мастер-класста катнашты

2022 елның 11 октябре, сишәмбе

Түбән Кама муниципаль районының балалар һәм яшүсмерләр өчен «Балкыш» социаль приютында тәрбияләнүчеләр «Үзенчәлекле фотограф» мастер-классында катнаштылар. Чараны коммерциячел булмаган «Барс» оешмасы һәм «Клен» фотостудиясе оештырды.

Мастер-класс «Ковер» Яшьләр инициативалар үзәгендә узды. Проектны оештыручылар «Барс» Хәйрия фондының ничек һәм нинди максат белән оештырылуы, алар хәл итәргә теләгән бурычлар турында сөйләделәр. Шуларның берсе – үсеп килүче буынга уңыш кына түгел, матди иминлек тә китерәчәк һөнәр сайларга булышу.

Мастер-класста укучыларны фотограф һөнәре белән таныштырдылар, фотога төшерергә өйрәттеләр. Шулай ук барлык катнашучылар өчен профессиональ фотосессия оештырылды.