Буратино «Веста»да мәктәпкә җыенырга ярдәм итте
Түбән Каманың «Веста» гаиләгә һәм балаларга социаль ярдәм үзәгендә «Мәктәпкә җыенырга ярдәм ит» хәйрия акциясе узды.
Түбән Каманың «Веста» үзәгендә булачак беренче сыйныф укучылары өчен бәйрәм оештырганнар: күңелле әкият геройлары һәм буйлы курчаклар балалар белән бергә табышмаклар чиштеләр, Буратино өчен мәктәп кирәк-яраклары тутырылган портфель җыйдылар, капчыктан балалар өчен билгеләр чыгардылар.
Ә аннан соң күп еллар дәвамында август хәйрия акциясендә актив катнашкан «Таттелеком» ГАҖ вәкилләре беренче сыйныфка баручы 10 балага мәктәп кирәк-яраклары тутырылган букчалар тапшырдылар.
Хәйриячеләр балаларга бары тик яхшы билгеләр генә алырга, укытучыларны игътибар белән тыңларга, үз иленең лаеклы гражданнары булырга, ә ата-аналарга сабыр булырга һәм балаларына ярдәм итәргә теләделәр.
Шулай ук кунаклар бу акциядә катнашу алар өчен зур җаваплылык булуын билгеләп үттеләр.
«Веста» үзәге булачак беренче сыйныф укучыларына канцелярия кирәк-яраклары тутырылган букчалар һәм матур бәйрәм кәефе өчен «Таттелеком» ГАҖнә зур рәхмәт белдерә.