Яңа Чишмә интернат-йорты волонтер эшчәнлеге турында видеороликлар конкурсында җиңде
Яңа Чишмә өлкәннәр һәм инвалидлар өчен интернат-йорты «вВЯЗывайся» социаль видеороликлар конкурсында җиңүче булды.
Конкурс Төбәкара волонтерлар инициативалары форумы кысаларында узды. Конкурс комиссиясе игътибарына Россиянең 8 регионыннан 20 материал тәкъдим ителде.
Яңа Чишмә өлкәннәр һәм инвалидлар өчен интернат-йорты «Мохтаҗ кешеләргә ярдәм итү» номинациясендә җиңүче булды. Видеороликны социаль эш буенча белгеч Мостафина Гүзәлия Фәргать кызы әзерләде. Ул «Өмет» эчке волонтерлык хәрәкәтенең кураторы булып тора. «Өмет»тә учреждениедә яшәүче актив, инициативалы һәм иҗади әбиләр һәм бабайлар тора. Волонтерлар аз хәрәкәтләнүче социаль хезмәт алучыларга киенергә, юынырга, азык-төлек сатып алырга булыша.
Инициативалы интернат-йорт карамагындагылар учреждение белгечләренә социаль акцияләр һәм спорт чаралары үткәрүдә ярдәм итәләр. Моннан тыш, өлкән яшьтәге волонтерлар күршеләрне урам тренажерларында тренировкаларга һәм скандинавия йөреше белән шөгыльләнүгә җәлеп итә.
«Безнең волонтерлар ял итү эшчәнлегендә актив катнашалар, бәйрәмнәр һәм иҗади дәресләр оештыралар. Белгечләр белән бергә алар өмәләрдә катнашалар, интернат-йорт территориясен төзекләндерү белән шөгыльләнәләр. Безнең волонтерлар бигрәк тә бакчада эшләргә, аннан күршеләреннән уңыш белән сыйларга ярата. Алар башкалар өчен чын үрнәк булып торалар», – дип билгеләп үтте проектның кураторы Мостафина Гүзәлия.