«Изгелек» үзәгендә тернәкләнүчеләр белән иҗади дәрес уздырдылар
Кичә Яр Чаллы шәһәренең «Изгелек» инвалидларны тернәкләндерү үзәге базасында социаль хезмәт алучылар өчен иҗади чара узды. Чарада ун реабилитант катнашты.
Чара барышында белгеч кәгазьдән эшләнгән әйберләр: кәрзиннәр, кашпо, органайзерлар, вазалар күрсәтте. Чарада катнашучылар кәгазьдән үрүнең төрле техникалары турында белделәр.
«Декоратив-гамәли иҗат илһамландыра, иҗади потенциалны ача, фантазияне үстерә, тынычландыра, сабырлыкка өйрәтә һәм үз-үзеңне бәяләүне арттыра. Моннан тыш, мондый дәресләрдә безнең тернәкләнүчеләр туганнары һәм якыннары өчен бүләкләр ясыйлар», – дип сөйләделәр «Изгелек» үзәгендә.
Социаль хезмәт алучылар билгеләп үткәнчә, бу иҗат төре кәгазьдән төрле әйберләр ясау буенча зур сайлау мөмкинлеге бирә һәм иҗади идеяләрне тормышка ашырырга мөмкинлек бирә.