«Өмет» комплекслы үзәгендә иҗади мастер-класс үткәрделәр
Бүгенге көндә милли кием предметлары популярлаша бара һәм көндәлек әйләнешкә күбрәк керә. Шуны истә тотып, 12 июль көнне Биектау районының «Өмет» халыкка социаль хезмәт күрсәтү комплекслы үзәгендә милли баш киеме – түбәтәй ясау буенча мастер-класс үткәрелде. Россия халыкларының мәдәни мирас елы кысаларында үткәрелгән чара халык сәнгать кәсепләрен популярлаштыруга юнәлдерелгән.
Мастер-классны оештыруда комплекслы үзәк белгечләреннән тыш, Бөтендөнья татар хатын-кызларының «Ак калфак» иҗтимагый оешмасы әгъзасы Гөлчәчәк Галләмова да катнашты. Әлеге чарада катнашу өчен «Рассвет» клубы әгъзалары – мөмкинлекләре чикле балалар тәрбияләүче әниләр чакырылган иде.
Дәрес бик җылы атмосферада үтте. Ата-аналар эшләнмәләр ясап калмыйча, милли кием традицияләре турында күп кенә яңа һәм кызыклы мәгълүмат белделәр.