Татарстан дизайнерларының инклюзив коллекциясе халыкара фестивальдә иң яхшысы дип табылды
21-22 майда Тула шәһәрендә узган Х «FASHION STYLE – 2022» мода һәм матурлык халыкара фестивалендә «Иске Казан әкиятләре» кием, аяк киеме һәм аксессуарлар инклюзив коллекциясе җиңүче булды.
Конкурста 15 кием, аяк киеме һәм аксессуарлар ансамбленең 10сы тәкъдим ителде. Проект «Э-моция» иҗат инклюзив студиясе тарафыннан Президент грантлары фонды ярдәмендә тормышка ашырылды. Проект кысаларында киезләү остаханәсендә 20 инвалид белем алган.
Идея авторы һәм сәнгать җитәкчесе – Неля Суркина, костюмнар буенча рәссам – Марина Родионова, ә модельләре – «Э-моция» студиясендә катнашучылар.
«Халыкара фестиваль минем өчен мөһим вакыйга булды һәм киезләү эшендә билгеле бер этап булды. Без Тулага остаханәнең эш нәтиҗәләрен күрсәтер өчен, осталардан безнең коллекцияләр турында фикерләр алырга, башка модельерларның эшләрен карарга дип килдек. Тулы бер коллективның иҗатына мондый югары бәя бирү бик күңелле һәм яңа казанышларга рухландыра. «Э-моция» театрына ярдәм һәм профессиональлек өчен зур рәхмәт», – дип уртаклаша Ольга Смирнова.
«Проект кысаларында инвалид булган кешеләрне укыту һәм эшкә урнаштыру – «Э-моция» иҗади инклюзив студия өчен яңа юнәлеш. Безнең өчен проект тәмамланганнан соң да, без хезмәттәшлек иткән кешеләргә ярдәм күрсәтүне дәвам итү мөһим. Безнең коллекция конкурста тәкъдим ителгән 65 кеше арасында бердәнбер инклюзив коллекция иде. Без җәмгыятьтә үзенчәлекле кешеләр булуын әйтүдән оялмыйбыз, матурлык – стандартлар түгел, ә эчкерсезлек, шәхес дип ышанабыз», – дип сөйли Неля Суркина.
Коллекциянең сәнгать ягыннан эшленеше нигезендә – традицион татар костюмы, заманча фикерләү. «Иске Казан әкиятләре» коллекциясендә кием-салым һәм аяк киеме ясауның борынгы традицияләре һәм заманча материаллар тупланган.