Биектау районында мөмкинлекләре чикле кешеләр үз сәламәтлекләре турында кайгыртырга өйрәнә
«Тигез мөмкинлекләр дөньясына юл» социаль проектын тормышка ашыру кысаларында 13 апрельдә Биектау районында урнашкан «Өмет» халыкка социаль хезмәт күрсәтү комплекслы үзәге психологы көндезге төркемдә катнашучылар өчен тренинг дәресләре үткәрде. Чарада тугыз кеше катнашты.
Дәрестә катнашучылар сәламәтлекне ныгыту ысуллары белән таныштылар, төрле күнегүләр ясадылар. Һәр катнашучы үзенең сәламәтлеген ныгыту алымнары турында сөйләде: гимнастика, үз-үзеңә массаж, файдалы ашамлыклар куллану, спорт белән шөгыльләнү. Эмоциональ халәтне нормальләштерү өчен өлкәннәр релаксация һәм визуализация алымнарын үзләштерделәр.
Әлеге чара көндезге төркемдә катнашучыларның психологик җайлашуын күтәрүгә ярдәм итте.
Дәресләрдән соң социаль хезмәт алучылар район спорт комплексында булдылар, анда алар өчен спорт эстафетасы, туп белән уеннар һәм башка активлык төрләре оештырдылар. Спорт уеннарында катнашучыларның барысы да күтәренке күңел һәм яхшы кәеф алдылар.