«Астра» белгечләре үзәкнең эшчәнлеге турында сөйләделәр
Шушы көннәрдә Алабуганың «Астра» мөмкинлекләре чикле балалар һәм яшүсмерләр өчен тернәкләндерү үзәге белгечләре «Сәламәтлек мөмкинлекләре чикле балалар белән эшләү үзенчәлекләре» дигән муниципаль семинар-практикумда әйдәп баручылар сыйфатында чыгыш ясаганнар. Чара А.Т. Гәрәев ис. 2 нче балалар музыка мәктәбе базасында узды.
Белгечләр музыка мәктәпләре педагогларына үзәкнең эшчәнлеге һәм оешманың эше турында сөйләделәр. Үзенчәлекле балалар белән эшләү технологияләре, формалары һәм методлары тәкъдим ителде. Практик өлештә укытучы-дефектолог Альбина Елизарова, музыка җитәкчесе Екатерина Токмакова һәм Монтессори-педагог Гөлнара Сабитова Go Talk альтернатив коммуникация чараларын һәм PECS карточкаларын куллану буенча мастер-класслар үткәрделәр.
Семинар кысаларында музыка мәктәпләре педагоглары һәм тернәкләндерү үзәге белгечләре инклюзив белем бирүне оештыруның заманча мөмкинлекләре һәм алга таба хезмәттәшлек турында фикер алыштылар.