«Тәтеш балкышы» үзәге «Үз куллар белән тылсым» проектын тормышка ашыра
Тәтеш районы халыкка социаль хезмәт күрсәтү комплекслы үзәгендә гаиләгә һәм балаларга социаль ярдәм бүлекчәсе белгечләре «Үз куллар белән тылсым» проектын тормышка ашыруны дәвам итәләр. Ул Татарстан Республикасында «Иҗтимагый инициатива – 2021» социаль проектлар конкурсында җиңүче дип табылды. Проект 18-40 яшьләрдәге мөмкинлекләре чикләнгән затларны адаптацияләү һәм социальләштерү өчен шартлар тудыруга, аларның иҗади сәләтләрен үстерүгә юнәлдерелгән.
Проектның бер юнәлеше – крючок бәйләү буенча дәресләр. Иҗади эшчәнлекнең мондый төре ләззәт алып килә, тормыш тонусын күтәрүгә һәм менталь инвалидлыгы булган кешеләрнең кәефен яхшыртуга ярдәм итә, алар эмоциональ яктан тотрыксызлар категориясенә керә. Кул эшләре тискәре эмоцияләрне бетерергә ярдәм итә, ә төркем белән дәресләр коллектив рухны формалаштыра.