«Кайгырту» акциясенә Югары Ослан районы халкы да кушылды

Өлкәннәр декадасы кысаларында Югары Осланның «Өмет утравы» халыкка социаль хезмәт күрсәтү комплекслы үзәгенең өйдә социаль хезмәт күрсәтү бүлекчәсе белгечләре һәм социаль хезмәткәрләре «Кайгырту» дигән акция уздырганнар. Акциянең максаты – йортларны җыештыруда һәм йорт яны участокларын кышкы чорга әзерләүдә адреслы ярдәм күрсәтү.

Акциядә катнашучылар зур эш башкардылар: өлкән яшьтәге гражданнар йортларында комплекслы генераль җыештыру үткәрделәр. Шәхси секторда яшәүчеләргә йорт яны участокларын җыештыруда ярдәм иттеләр, аларны коры үләннән һәм чүп-чардан чистарттылар.

Өлкәннәр бик шатланып ярдәмне кабул иттеләр һәм кайгыртучанлык күрсәткәннәре өчен рәхмәт әйттеләр.