Минзәлә халыкка социаль хезмәт күрсәтү үзәге карамагындагылар янгын сүндерү бүлегендә булып кайтканнар
«Син барысын булдырасың!» программасы кысаларында 24 нче августта Минзәлә районы халыкка социаль хезмәт күрсәтү комплекслы үзәге белгечләре янгын сүндерү бүлегенә экскурсия оештырганнар.
Янгын частенә керү юлында формада егетләр каршы алдылар: Минзәлә эзләү-коткару төркеме башлыгы Виктор Комаров, гадәттән тыш хәлләр министрлыгы хезмәткәрләре. Янгын сүндерү хезмәте хезмәткәрләре янгын сүндерүчеләрнең эше турында сөйләделәр һәм янгын сүндерү машиналарын күрсәттеләр, машинаның ничек оештырылуын аңлаттылар. Үзәк карамагындагылар янгын сүндерүчеләрнең костюмнарын сынадылар. ГТХМ хезмәткәре белән әңгәмә барышында кызлар һәм егетләр янгын килеп чыкмасын өчен нинди куркынычсызлык кагыйдәләрен үтәргә кирәклеген, бәла булган очракта үзеңне ничек тотарга кирәклеген белделәр. Янгын сүндерүчеләр килүчеләргә ашыгыч хезмәтләрнең номерларын искә төшерделәр.
«Янгын сүндерүче һөнәрендә «очраклы» кешеләрне табу кыен. Янгын сүндерүче – ул эш кенә түгел, ә сәләт тә. Һөнәр кыюлык, батырлык һәм кешеләргә мәхәббәт таләп итә», – дип билгеләп үтте Виктор Комаров.