Бүген Минзәлә өлкәннәр һәм инвалидлар өчен интернат-йортының медицина хезмәткәрләре Раушания Гәрәева һәм Розалина Ишимбаева «Әйдәгез танышыйк!» дигән күңелле уен үткәрделәр.
Соңгы вакытта интернат-йорт яңа кешеләр кабул итте, һәм алар зур һәм тату гаилә белән тизрәк танышсын өчен, кызыклы чара оештырылды. Музыка астында, тупны кулдан кулга тапшырып, өлкәннәр башта үз исемнәрен, ә аннары күршеләренең исемен атадылар. Яңа социаль хезмәт алучылар белән танышу шулай уен формасында узды. Аннары медицина хезмәткәрләре яшәүчеләргә интеллектуаль биремнәр тәкъдим иттеләр: ребуслар, табышмаклар, сораулар.
Дәрес ярдәмендә социаль хезмәт алучыларның кәефләре яхшырды һәм интеллектуаль эшчәнлекләре активлашты.