"Кояшкай" үзәге карамагындагы балалар дуслык марафонында катнашты

2019 елның 29 ноябре, җомга

Инвалидлар декадасы уңаеннан 29 нчы ноябрь көнне Яр Чаллы шәһәренең "Кояшкай" мөмкинлекләре чикле балалар һәм яшүсмерләр тернәкләндерү   үзәге тәрбиячеләре  "РостРесурс" инвалидларны тернәкләндерү ассоциациясе волонтерлары белән берлектә "Дуслык марафоны" исемле спорт-күңел ачу чарасы үткәрде.

Анда 56 реабилитант һәм 18 ата-ана катнашты. Чараны үзәктә тәрбияләнүче Әмир Рәҗәпов "Дуслык" җыры белән ачып җибәрде. Балалар янында кунакта  танылган мультфильм геройлары Винни-Пух һәм Пятачок булды. Алар үз кәефләре белән спорт-уен эстафетасында катнашучы һәркемне шатландырдылар. Малайлар һәм кызлар тизлектә һәм җитезлектә ярыштылар. Һәр команда җиңәргә  тырышты. Балалар бик теләп ярыштылар һәм тырышлыклары өчен һәркем татлы бүләкләр алды.