Зәй волонтерлары ВИЧ профилактикасы буенча акция уздырдылар
ВИЧ - ХХI гасыр инфекциясе, аңа каршы көрәшү дә катлаулы. Ул афәт өлкәннәрне генә түгел, балаларны, йөкле хатын-кызларны, яшьләрне, хәтта олы яшьтәгеләрне дә зарарлый. Шуңа күрә ВИЧ, СПИДны профилактикалау бүгенге көндә иң актуаль тема.
Шул уңайдан 5 февраль көнне гражданнарның игътибарын ВИЧ-инфекция проблемаларына җәлеп итү максаты белән һәм әлеге афәтне профилактикалау кысаларында “МИН+СИН-СПИД” дип исемләнгән акция оештырылды.
Әлеге акция барышында Зәй муниципаль районының “Шатлык” комплекслы халыкка социаль ярдәм күрсәтү үзәгенең гаилә һәм балалар белән эшләү бүлеге белгечләре, “Волонтерлар” ирекле хәрәкәте белән берлектә ВИЧ - инфекцияне профилактикалау буенча мәгълүмати буклетлар тараттылар, сәләмәт яшәү рәвешен алып барырга өндәделәр.
Акциядә барлыгы 72 кеше катнашты.