«Өмет чаткысы» үзәгендә тернәкләнүчеләрнең ата-аналары өчен мастер-класс узды

2021 елның 11 августы, чәршәмбе

Арчаның «Өмет чаткысы» мөмкинлекләре чикле балалар һәм яшүсмерләр өчен тернәкләндерү үзәгендә мандалотерапия технологиясен кулланып эш дәвам итә. 10 августта узган чираттагы мастер-класста тәрбияче Инна Нурмиева җитәкчелегендә мандаланы тәрбияләнүчеләрнең ата-аналары ясады.

Эштә кызыл фасоль, ак роза һәм лилия чәчәкләренең таҗлары кулланылды. Мастер-класс «Бии торган мандалалар» музыкасы астында үтте.

Эш төгәлләнгәннән соң, катнашучылар аның сәнгати тасвирламасына күчтеләр: иҗади эшләренә исем уйлап таптылар, хис-тойгылары турында сөйләштеләр.

Белгеч сүзләренә караганда, мандала ясау дәресләрендә эмоциональ киеренкелек һәм борчу дәрәҗәсе кими һәм хис-тойгыларны күрсәтү мөмкинлеге туа.